RubberBand樂園賣藝鼓舞飛揚

RubberBand忙於籌備全新創作大碟，為增添新元素，他們四出搜羅特色樂器，日前四子抽空遊樂園一日獎勵自己，鼓手泥鯭及結他手阿偉更即興表演敲擊樂，遊人個個拍爛手掌！

四人樂隊RubberBand完成五場演唱會後，又忙於籌備新碟，早前他們推出致敬專輯《Dedicated to...》，下一張「E」字頭大碟將回歸原創之路，為帶給樂迷聽覺上新享受，他們搜羅多款奇異樂器，結他手阿正最近為樂隊購入新樂器，他說：「咁啱有個朋友放Tabla鼓（印度敲擊鼓），我就決定買，因為個鼓喺香港好難搵。」

泥鯭慫恿6號結婚

四子即將啟程往中東地區拍特輯，乘機找尋創作靈感，主音6號說：「我哋嘅音樂一向係較南美洲、非洲風格，嚟緊會去土耳其，睇吓會唔會發掘到新嘢！」

日前RubberBand抽空去香港迪士尼樂園大玩一餐，叉足電準備迎戰！鼓手泥鯭及結他手阿偉即興露兩手，跟樂園鼓手表演敲擊樂，引來不少遊人圍觀。四子相當合拍，坦言因平時工作見得太多，私底下不常見面，盡量抽空陪家人。

而有穩定女友的6號表示，麥玲玲建議他們今年結婚，泥鯭亦舉腳贊成：「今日唔知聽日事，唔應該因為事業阻礙自己諗法！」