蘇志威搵接班人唔吼囡囡

蘇志威（阿細）跟劉小慧育有兩個寶貝女，細女靖珺雖遺傳了爸爸的跳舞細胞，但阿細無意讓女兒做接班人，隨女兒喜好選擇。

草蜢出身的阿細渾身是勁，曾被蔡一智形容為草蜢中跳得最叻，最近他在尖沙咀開設跳舞學校iDANCE，並表示太太小慧也有上跳舞堂：「佢唔使跟我跳，佢好似跳Slim嗰隻舞。」工作繁忙的他，暑期考慮開一個短期親子班，親自教導父母跟仔女跳舞，他說：「我細女都鍾意跳舞。（叫佢做你接班人？）唔會！佢哋鍾意做乜就做乜。」

教人尋開心

阿細早在兩年前開設第一間跳舞學校，因為他希望將跳舞帶給他的快樂感染每一個人：「好記得05年草蜢開騷，每日我哋一練就直踩8個鐘，係咁跳，跳完一身汗，望住塊鏡我覺得好開心，跳舞既可以當運動強身，又冇跑步咁悶，係一個唔差嘅運動。」

阿細隨意舞動起來，他笑說：「我學校年紀最大嘅學生成60幾歲，老少咸宜，只要手腳識得郁就得啦！」目前學生已逾4,000人，投資了7位數的阿細，為學生特設防地震地板，他說：「大家跳舞時冇咁易整傷膝頭。」