RubberBand慢慢捱信細水長紅
樂隊RubberBand雖然捱了四年才出頭，但四子早已做好心理準備，皆因不希冀一下子竄紅，擔心剎那光輝不是永恒，寧願細水長「紅」。
不經不覺RubberBand（RB）已經出道四年，在樂壇已站穩陣腳，但他們坦言距離目標尚有一段長遠距離，熱愛音樂的四子視歌唱事業為長遠發展：「我哋做好心理準備，最少要捱多幾年，你睇啲歌手個個都要捱五、六年啦！呢行唔係一、兩個月可以竄紅，急功近利唔係好事，可以嘅話寧願細水長流。」
每次出碟壓力大
RB剛推出第四張英文字頭的新碟《Dedicated to...》，承認製作每一張碟均有壓力，因為一直堅持每張碟要有質素：「每一次都希望突破自己，尋求新方向，做人有要求係應該嘅。」今次大碟中，他們以翻唱昔日別人經典歌曲為主，如盧冠廷的《陪着你走》及杜德偉的《擦身情緣》等，問到可會擔心被人拿來與原唱者比較？四子表示碟中經典歌曲有一定影響力，能夠翻唱已感到大挑戰，主音6號說：「盡量唔去諗比較。」
初出道時經常不被看好的RB，剛完成一連五場的音樂會，叫好又叫座，問到會否覺得吐氣揚眉？成員泥鯭說：「點解要咁講？我哋又唔係有咩屈辱，應該係『守得雲開見月明』，帶個正面訊息畀大家，每個人都有進步嘅一日。」
