呂慧儀插無綫節目抄無可抄

呂慧儀最近認真夠膽，在微博上公然指公司無綫自己抄自己節目後，昨日她即知衰急刪內容，並承認是誤會一場，不擔心被公司「照肺」！

繼黃日華在微博炮轟無綫大細超後，日前呂慧儀竟公然挑戰公司，在微博表示自己在收費電視台拍的消夜節目《越夜越美味》，與翡翠台的《午夜出動》既是同類型節目，那麼觀眾何需再付錢收看呢？她質疑公司在節目編排上出現問題：「是因為公司節目抄無可抄，要抄自家的收費節目？這些都太讓本人費解了。」未知呂慧儀事後是否知道「玩大咗」，昨日已連忙將留言刪除。

澄清一場誤會補鑊

呂慧儀昨日在電話中為自己的「失言」解畫：「我睇電視片頭以為《午》係講食消夜嘅專題節目，咁咪同我哋喺收費台已出街嘅《越》一樣，後來主持《午》嘅高Ling（高海寧）喺電話同我解釋，佢哋個節目係講玩樂，唔完全一樣，我都知係自己誤會咗，都覺得唔好意思！」她承認當初覺得很氣餒，但否認是向新老闆反映不滿：「冇留意公司賣咗盤，點敢反映。我哋個節目出咗街，台前幕後花咗好多心機、好努力去做，當初以為同《午》同類型，好傷心！依家知係誤會一場咪當宣傳囉！一齊做好件事，大家都有好收視。（擔心被高層『照肺』？）我諗冇時間喇！我拍嘢拍得好密。」

文：專案組