工作中過生日的陳茵媺（Aimee）與Alice B.，昨日出席鐘錶活動，春風滿面的Aimee近日與陳豪傳緋聞，同場的Alice B.乘機取笑她。當大會送上一對錶給Aimee時，她笑得非常燦爛，問到如何慶祝生日時，她說：「應該有個Pizza Party。（有冇請陳豪？）冇呀！（佢Send訊息畀你？）有，佢祝我生日快樂！（你今日笑得特別甜喎！）生日開心嘛！」
被問發展：「唔知點答」
她坦言二人未有預祝生日，對方未有送贈禮物及相約慶祝，強調現時大家只是好朋友，現階段以工作行先，對於緋聞男友稱讚她，她說：「佢係一個好男人、Gentleman。（有冇飲咖啡？）成日都飲，佢會介紹我哋《心戰》一班工作人員飲靚咖啡，仲會整畀大家飲，大家都讚好飲（有冇發展機會？）都係工作行先啦！都唔知點答。（拍拖？）未拍。（介唔介意一齊做嘢？）唔介意，同任何同事工作都開心。」
而Aimee透露生日願望是嘗試不同角色，對於TVB正式易手，她表示對自己影響不大：「希望會有更多唔同嘅新嘗試，可以演出多啲有挑戰性嘅角色。」
文：影視組
生日也開工的陳茵媺春風滿面，笑容甜美。
陳豪被爆曾炮製咖啡給陳茵媺品嘗。 （資料圖片）
陳茵媺與Alice B.（左）齊齊出席鐘錶活動。