Amanda S.押後造人大計
名模Amanda S.昨日與蔣怡、丁子高及趙增熹出席DBS信用卡活動，她透露每當做錯事，只要為未婚夫下廚便會獲原諒：「不過依家煮得太多，變到冇乜用。我屋企用開放式廚房，煮中餐太多油煙，所以多數煮西餐。（搬屋換廚房？）最近太忙，又結婚又開甜品舖。（冇時間生BB？）今年一定唔得，要開咗舖、穩定咗先。」問到會否親自製作結婚蛋糕，她說：「唔會啦！但已經諗好點整，會搵人整。」
至於丁子高則自爆會為楊千嬅煮麵，並指太太有幾道拿手小菜：「例如炒蟹同咖喱雞！（喺條頸嗰種？）呢個我自己食o架！」對於千嬅自爆曾遭第三者騷擾，他笑說：「係我扮聲打畀佢，其實我一直追咗佢好耐！」
Amanda S.（左）低胸上陣，搶去蔣怡不少風頭。