趙彤演無知港女腦殘

台灣女星趙彤（Yedda）最近執　模尹蓁晞（Yumi）二攤接拍亞視劇集，飾演無知兼有「公主病」的港女，令「有腦」的她壓力爆煲喪爆瘡！

曾與霍啟剛傳緋聞的Yedda，原本在內地擔任電視節目主持人，最近轉戰香港，除了拍電影及任電台主持外，最近還接拍了金牌監製鄧特希的新劇《親密損友》。鑑於角色無知兼有「公主病」，她坦言與其「有腦」性格大相逕庭，故極具挑戰性，更因努力「扮無知」導致壓力爆煲兼爆瘡，她說：「我唔係好識扮無知，導演又叫我眼神空洞啲，講嘢要唔係好明咁！依家好努力去扮，希望扮得神似。」有見及此，Yedda趁工作空檔到銅鑼灣求救著名針灸中醫師，她透露過程雖然痛楚，但專業治療能紓緩其「瘡情」。

Mark實霍啟剛捧場

有指角色原本屬意Yumi，但盛傳她因「發仔瘟」而遭公司雪藏，令Yedda冷手執個熱煎堆：「我唔介意執二攤，總之做好本分就得！」身材凹凸有致的她揚言，明白角色需要，不介意性感演出。問到會否着緋聞男友霍啟剛支持新劇，她說：「冇呀！呢排冇同佢聯絡，套劇播出街會叫佢支持吓！」