林熹瞳校服誘惑重拾初戀
有「怪談女」之稱的林熹瞳，放下平日出入靈異之地那副強悍大膽，換上一身純情學生校服Look，走到學校區扮學生妹，分享一段二八年華的校園戀事。
林熹瞳（Rachel）換上白襪仔、格仔校裙、恤衫與羊毛冷衫，即時變身中學生，她說：「我超鍾意着校服，細個有個習慣鍾意燙校服，我覺得將啲校服燙到直一直至着，感覺好整齊、好靚。女仔去到讀中學嘅年齡，通常都好注重自己外表，我都唔例外，嗰時我為咗靚，仲專登孭斜孭袋，仲扣好多襟章上去裝飾，點知後來好多同學都用斜孭袋，於是我就轉孭側孭袋，想有啲個人風格。」
掛住拍拖成績退步
雖然Rachel花了不少心機扮靚，但未有因此荒廢學業，她說：「讀初中時我考過全級第一，我最鍾意中文、中史同世界歷史，因為鍾意聽故事，呢啲科目有古仔聽嘛！不過中三嗰年同個中四嘅師兄拍拖，結果我啲成績跌到落全班第七，就算後來分手，都考唔番全級第一。後來會考又撞正失戀，冇心情溫書，不過我一早立志讀演藝，雖然後尾會考有雙位數成績，但演藝收咗我，我開心到喺屋企轉咗幾個圈，仲唔使同人搶中六學位添！」
