桂莉芙37歲發Sing變變歌后

金像影后桂莉芙白德露在最近5年都未有擔正，至去年才再擔大旗，在新片中飾演一個受酒癮及醜聞困擾的歌后，更開金口錄製主題曲！

記：記者　桂：桂莉芙白德露

記：拍《Country Strong》前，熟唔熟鄉謠音樂？

桂：完全唔熟！我喺紐約長大，好少接觸鄉謠音樂，直至我接咗呢部戲先正式認識鄉謠，更加愛上咗！我從來冇諗過自己會鍾意鄉謠，更估唔到37歲先嚟發掘對呢種音樂嘅興趣！

記：點樣令自己投入角色？

桂：我睇咗好多鄉謠歌后嘅演出，學習佢地嘅動靜。不過最幫到我嘅係Beyonce，佢係一個好好嘅表演者，好有大將風範！我會同自己講：「如果有佢十分一咁自信，我已經可以演好呢個角色！」

記：戲中有好多唱歌嘅戲份，之前有冇學唱歌？

老公與Beyonce教路

桂：冇正式學過，都有唱開歌，不過我把聲一直都好柔。接咗部戲後，有唱歌老師幫我開聲，逼我練出更雄厚嘅聲線，再由頭學唱歌！

記：你老公Chris Martin都係音樂人，有冇請教佢嘅意見？

桂：偶爾都會問吓佢意見，佢亦好尊重我工作！最幫到手係我班女仔朋友，尤其係Beyonce同Faith Hill。佢哋好支持我，Beyonce喺我由倫敦出發去納什維爾拍戲前畀咗好多心得我，而Faith就喺我去到拍攝當地提點我，仲會喺片場睇我做戲。

記：你依家喺倫敦定居？

桂：喺仔女要返學嘅日子會住倫敦，佢哋喺嗰邊返學，不過假期會盡量返紐約，兩邊都住吓！

記：工作同家庭，係咪好難平衡？

桂：我將私生活同工作分得幾開，仔女亦好少睇我嘅戲，但大概都知我做咩！大女Apple啲同學仔都認得我，會話：「我喺雜誌見到你！」然後就一大輪問題……仔女曾經以為我係唱歌維生，好搞笑！

記：因為爸爸係音樂人？

桂：應該係因為佢見到我為新片籌備嗰年，日日拎住結他練歌，所以以為我係歌手！

減少拍戲多陪家人

記：嚟緊會接更多電影？

桂：我未有計劃喎！暫時我都係1年接1部電影左右。舊年拍完《Country Strong》，之後又拍《Contagion》，好彩只係小角色，飛去香港拍咗1日戲，又喺芝加哥拍咗4日。現階段都唔打算接太多戲，因為想留多啲時間畀屋企人。

記：講吓你喺《Contagion》嘅角色吖？

桂：我飾演一個早期感染咗病毒嘅普通人，琦溫斯莉就飾演疾病控制同預防中心嘅醫生。套戲好刺激，雖然我嘅戲份唔多，不過都係重要嘅角色，可以同導演史提芬蘇德堡合作，我覺得好開心！