阿徐心痛老公辛苦暫停造人

樂壇搶手貨陳奕迅傳以5億天價斟轉會，「臣嫂」徐濠縈昨日坦言老公要搵血汗錢，只好暫停造人大計，並無奈地說：「不過我OK，我仲可以等吓。」

徐濠縈、謝婷婷、模特兒姚予晴及楊崢等，昨日出席FENDI 2011春夏系列時裝預展，雖然氣溫跌至十度以下，但愛靚唔愛命的阿徐仍穿春夏裝到場，冷得大叫「好凍」，她坦言為工作難免要作出犧牲：「我知道今日要着呢套衫同露趾鞋，尋日去咗修腳甲，修完之後唔想整花腳甲，就着住對人字拖走，途人都眼望望，心諗唔係潮成咁呀！上身皮草下身人字拖，我都覺得自己九唔搭八！」

唔要求加家用

談及老公陳奕迅（Eason）傳以5億轉會，問到是否很開心？阿徐即叫記者不要這樣說，更替老公辛苦：「係辛苦錢，收咗人錢要還血汗，其實最緊要佢開心，唔係睇錢。（佢值唔值5億？）一分耕耘一分收穫！（加你家用？）唔使，都話係血汗錢！」問到造人大計是否因而押後，她無奈地說：「係呀！如果佢咁忙，我自己都忙，專心湊好個女先。不過我OK，我仲可以等吓，唔使擔心，雖然想要小朋友，但有時環境因素唔可以咁快生到。」

至於謝婷婷則在眾人中穿得最多，她表示身上的服飾由她所選，因她喜歡白色，但每次吃飯總會弄髒衣服，以致被母親取笑「食飯似打仗」。她指父親謝賢同樣愛穿得一身白：「有次中學畢業禮，台下有好多觀眾，喺人海之中一眼就見到佢，因為佢着住白色衫。」