Baby日系Fur少女

Fur今季大行其道，時裝設計師陳刀指Fur予人高貴感覺，宜襯貼身衣物，想穿得乾淨利落，可效法天后王菲的冬天冰雪Look及Angelababy日系少女打扮。

Angelababy 9分

「我鍾意Baby呢個好日本嘅着法，本身啲嘢好靚，配飾又唔會太搶，束髮恰到好處，條喱士連身裙長度啱啱好，要咁短嘅款先襯到，上下嘅Fur好襯，腳成為Focus。」

王菲 10分

「條裙好靚，好有雪地感覺，佢夠Cool，成個冰冷感覺好出，佢頂帽普通人戴就似泳帽，但佢戴咗先令個造型寧靜，反而唔戴見到頭髮，就會冇咁乾淨。」

劉心悠 5分

「咩事呀？佢唔得囉！着到佢冇身材，似普通女仔，冇星味。呢種褲冇乜人着，換黑皮褲同黑鞋仲好。建議佢束起頭髮，上身加番長頸鏈，成個人會Full啲。」

佘詩曼 7.3分

「唔係唔靚，但Fur太長身，依家佢個比例有問題，去到胸底會爽朗番，拉長個人比例，加埋簡單輕身配飾喺手同頸，整個造型更加配合。」

林志玲 6分

「本身佢全黑撞金鞋好靚，但依家好Bulky，應該束起頭髮，件衫可以細少少，Fit身啲，見番條腰仲Sexy。」

Rosemary 7分

「Rosemary膊頭個毛毛似啦啦球，唔夠高貴，冇咗柔軟感，色Tone襯佢，建議加番細嘅鑽石吊墜喺胸口，依家佢嘅『事業線』太勁喇！」

諸葛梓岐 8分

「靚嘅，但略嫌衫身長啲，同入面件Tube一樣長會好啲，輕巧啲，加番頸鏈，或者喺Fur背心外套上面扣番心口針。」

周秀娜 7.5分

「着錯Boots！着咁豪邁嘅Boots有問題，少少出事，着高踭鞋同長Boots都冇事。短身Jacket令人比例較長，但呢個活動係唔係喺旺角搞？係宅男鍾意嘅造型。」

陳刀Profile

陳刀畢業於香港理工大學時裝設計系，於城市大學修讀日本研究後，創立個人時裝品牌，更於03年舉行首個時裝展，現替周子揚及羅力威等男星設計形象。