Toby冧掂二億闊少明年嫁人

日前敖嘉年遇襲，梁靖琪（Toby）因送他入院而傳緋聞，但隨着Toby拖着六呎真命天子現身後，緋聞即煙消雲散；反觀敖嘉年的遇襲事件卻爆出戲劇性內幕，令「最佳男配角」獎危危乎，這對「緋聞鴛鴦」的命運可謂差天共地！

梁靖琪（Toby）入行以來與不少男星傳緋聞，但全都是「冇米粥」，其真命天子近日終於現身，二人拍拖不夠一年即火速鐵定於明年結婚，據知他們已秘密影了婚紗相，男方更送上六位數字的兩卡鑽戒「落訂」！

Toby的31歲未婚夫黃敏豪（Aaron）身家估計約有二億元，擅長投資豪宅堪稱「炒樓王」，最近Toby頻頻帶男友現身，繼早前被拍得跟Toby媽媽蕭笑鳴（前無綫高層）撐枱腳後，前日又手拖手偕外籍女友人現身銅鑼灣日本餐廳食飯，為了跟身高六呎的Aaron拉近距離，Toby穿了一對四吋高跟靴，雖然從停車場到餐廳只有數分鐘路程，但他們都甜蜜得如連體嬰，Aaron對女友照料有加，每次過馬路都睇清楚才讓Toby行，細心舉動冧爆Toby，令她忍不住不時依偎在男友膊頭上撒嬌，而Aaron全程都捉實Toby戴着戒指的左手。

見家長順利過關

三人抵達餐廳後，Toby與Aaron繼續活在二人世界中，令同行女友人變成「電燈膽」，狀甚冇癮！Aaron對Toby的口味一清二楚，全程由他「發辦」，Toby看到滿桌心水美食後，即向Aaron報以甜笑答謝。除了同桌女友人眼冤外，其他食客都被此煙韌場面吸引，不時行注目禮！

擔知，Aaron除了跟岳母食過飯，亦順利過了對女婿要求甚高的岳父梁家樹一關，跟Toby結婚一事可算十拿九穩！記者致電Toby恭喜她快將結婚時，她只以笑回應，未肯正面回答是否明年結婚：「我係拍緊拖，Aaron對我好好，我屋企人都好鍾意佢。（係咪收咗兩卡鑽戒？）吓！你見到咩？我唔講喇！總之係結婚我會講。」