鄧麗欣（Stephy）昨日由昆明返港出席《兒童金口獎》活動，提到最近與緋聞男友方力申（小方）於當地拍劇，問到有否因此增進感情？Stephy說：「吓？我哋好忙，冇得玩！我哋都多對手戲嘅，係多時間聚埋一齊，不過唔係兩個人啦！」她還大讚工作人員照顧周到：「佢哋知我用唔慣踎廁，特登整咗個坐廁畀我，小方都冇o架！（借畀佢用？）男仔去廁所好方便，如果佢有需要，開大都可以借畀佢嘅！」
另外，對於餅碎開騷表現差遭批評，Stephy即力撐姊妹，並解釋為何沒有送花籃：「開騷前已經去咗內地，唔記得咗，都有傳番SMS畀佢哋！（有傳你同Angela帶頭杯葛傅穎？）我冇留意報道喎！希望同是非絕緣啦！」
