阿倫紅館騷昨晚尾場，契仔Kelvin以神秘嘉賓身份出現，今次是他於年半前在日本涉嫌「藏毒案」後，首度以「重生」姿態在紅館演出！愛搞爛Gag的阿倫，介紹契仔時亦變得嚴肅：「今次個唱嚟嘅都係最親最好嘅朋友，好想搵一個人出嚟！未來係要佢自己面對，做錯咗要面對、承擔，希望畀個機會呢個年青（輕）人……Kelvin出嚟呀！」Kelvin送花表謝意，阿倫再當眾訓示契仔後說：「只係想你聽清楚呢首歌！」二人合唱勵志歌《成功需苦幹》，期間更攬頭攬頸！Kelvin邊唱邊落淚，阿倫在他耳邊說：「乖啲！」

關楚耀（右）上台送花給契爺阿倫，認真識做！	阿倫（右三）與Mr.開香檳慶祝個唱圓滿結束。	溫拿在台上Jam歌，觀眾聽出耳油。

含淚感激歌迷支持

Kelvin全程不敢多言，只連聲多謝，表示已感受到歌詞的真諦，全程說話不足5句。不過阿倫仍以「嚴父」口脗說：「係要多謝你自己諗清楚，做畀人睇，返入去啦！」有歌迷大讚阿倫好Man，但他面露「難為天下父母心」的表情說：「依家教細路，好辛苦！」

另外，阿倫在紅館舉行8場演唱會期間，曾兩度遇颱風襲港，但素有「幸運麟」之稱的他得上天眷顧，風雨無阻演出，連周四晚天文台發出黑雨警告，剛巧是個唱休場。前晚的個唱嘉賓是鍾鎮濤，昨晚連戲與其他溫拿成員擔任尾場嘉賓。

安歌時，阿倫再請溫拿出場，而阿B的囡囡鍾懿走到台前。阿倫指時間改不了他與歌迷互相支持及感激，唱《無言感激》時更落淚！個唱因超時被罰五萬元。而阿倫在後台受訪時坦言，曾為Kelvin應否出台而猶豫，直至四日前才決定給他機會，他形容Kelvin是表白不是表演。阿倫透露現時的小朋友只懂打機，幸好兒子曉風可保留中國傳統尊重長輩的美德。