昨日Baby身穿Forever 21短裙，在海港城海運大廈SportX舉行簽名會，現場派出300個籌，卻吸引到約千名Fans。無暇宣傳寫真的她，被問到是否知道銷量時，她說：「唔知，唔想亂講，費事作大，但上年出3萬本，今年已超過，會喺中、港、台、日發售。」其他o靚模瞓身宣傳，Baby不屑地說：「知本書銷情好好，呢幾日都喺度賺錢，冇乜宣傳，但都知有得加印。」她表示今日飛日本工作，無暇巡視書展。

對於簽名會地點與周秀娜（Chrissie）僅一街之隔，Baby說：「我冇心同佢爭，冇當其他人係對手，但唔係唔尊重佢哋，銷量幾多真係唔知，邊有出版社日日數，佢哋係都忙賣書。」似暗示其他人亂報數！談到Chrissie送舊Bra給粉絲谷銷量，Baby說：「我唔知，佢嘅Fans應該會有感覺，但我又唔係男人。（你有乜招數？）我睇吓賣到幾多書，諗住將收入捐逾10%畀小朋友嘅慈善機構。（粉絲失望？）我回饋社會，相信佢哋都會開心。」

撐寫真集唔意淫

對於其寫真被指抄襲日本名模梨花的寫真，Baby即面色一沉，不悅地說：「佢本寫真我睇過，好欣賞佢，但完全唔似，無論感覺、造型都唔似。（畀人咁講唔開心？）冇唔開心。（你寫真內升Cup？）我平時唔谷，寫真可以谷吓。」此外，問到書展文化活動顧問團成員伍曼儀，指今年的o靚模寫真集欠藝術和意淫，Baby即說：「我好光明正大，我本寫真好藝術，攝影師都係藝術家，完全唔意淫。」她坦言未見過其他人的寫真，不知是否過火。至於有否看過師妹楊汀叮的寫真，Baby說：「有睇過，汀叮嗰本都唔係意淫，睇完我諗唔到意淫。」

簽名海報網上炒

問到緋聞男友黃曉明有否看過其寫真？Baby則說：「我有叫佢買，但佢應該未睇，佢唔喺香港。（曉明被指整容？）佢完全冇改變，可能造型問題。（有指曉明力薦你參演電影《神奇》？）呢段時間有好多公司接洽拍電影，但有冇時間演出仲未知道。」而據知Baby寫真已售出逾2萬本，原定印3萬本包括中、港、台、日，但除日本有書外，其他地方要等加印，而有書在手的日本已再加訂。此外，Baby在微博表示簽名簽到手臂斷掉也值得！而昨晚有人把Baby的親筆簽名海報放上網炒賣，海報開價一百元，暫已有數個網友回應。