陳法拉、鍾嘉欣、馬浚偉、姚子羚、朱慧敏和梁政珏等《蒲松齡》演員，昨日到油塘一間學校與學生及家長玩遊戲，齊齊預祝父親節。法拉表示雖然今日父親節要拍劇，但孝順的她早已訂購相機送給爹哋，記者笑問她下年父親節，會否帶個老公出現？法拉笑說：「最好唔好，我爹哋會呷醋o架！喺美國讀書時，我帶過男友返屋企，爹哋喺飯枱攤大張報紙粒聲唔出，媽咪之後都勸佢話個女遲早都要嫁，咪個個都睇唔順眼。」

朱慧敏（左起）、鍾嘉欣和馬浚偉，在台上言談甚歡。

鍾嘉欣和馬浚偉一同玩遊戲，更為緋聞闢謠。

問到爹哋有否見過其男友？法拉說：「佢見過我啲朋友，反應好啲喎！未攤開過張報紙。（過咗一關？）唔知，爹哋心中有數，佢懶沉默咁，但對住我就四萬咁口。」原來其Neway太子爺男友薛世恒早已過了見家長一關！談到是否好事近，法拉坦言是大件事，要看自己及朋友的工作，而她的事業發展不俗，故不會輕易放棄。

否認暗戀馬浚偉

此外，鍾嘉欣對於被吳家樂踢爆暗戀馬浚偉，她說：「黐線！梗係冇暗戀啦！吳家樂咁講係因為我拍《蒲松齡》時，身體狀況好差，佢哋就話因為我喺個劇抽離唔到，我抽離到o架！次次都得，都唔知抽離得幾好！暗戀馬浚偉係完全冇可能嘅事！」另有報道指馬浚偉與法拉齊齊欺負她，嘉欣亦斷然否認，並指三人合作無間，感情甚佳。