對「星光家族」愛護有加的肥媽，昨日回應千嬅回收疑似走音派台歌時，似暗自抬高星光乖仔乖女：「一定唔關千嬅事，Producer、收音師、唱片部收得貨，即係會用機執靚，不過都有樣嘢好，依家新嗰班唔會有呢個問題，佢哋唱Live出身。（你指千嬅唱功比唔上新人？）我冇咁講！不過大家都贊同，我有乜資格咁講？係網上有人咁講，千嬅都進步咗好多。（班音樂人用咗NG版嚟Edit？）畀咁多錢佢哋咁都錯得？（係另類宣傳？）咁條橋就好差囉！仲有邊個會買隻碟？又或者呢條橋要好高智慧先諗得到，可以話廣告奇才！」此外，肥媽自資助「星光1班」圓出碟夢：「當做善事，但求唔蝕！（預計用幾多錢？）幾十萬！」

微博平反回收「很普通」

另一邊廂，千嬅在微博就事件表態：「言重了。其實沒有甚麼鑊要補。只是一個唱片製作的過程。在唱片還沒有發售之前，若是有甚麼更新更好的想法，或更好的演繹，都可改動。很普通，很正常，很彈性的，也是我應該的。派台版本只是暫時性，唱片才是永久保存，甚至比我長壽。水瓶人都是會比較自我執着的，請見諒！」