陳志雲、錢國偉及陳永孫等無綫高層被ICAC拘捕，據知無綫傳令上下封嘴，但曾傳與無綫不和的王賢誌（Vinci）則藉此踩多陳志雲一腳，連與無綫不歡而散的袁彌明都暗寸他，指他拜甚麼神都沒用。Vinci昨日分別在電話及公開活動中接受訪問，直言與陳志雲不和，更表示事件與陳志雲早前被傳離職無綫很巧合：「空穴來風，未必無因！啲朋友問我個Friend係咪畀人拉咗，我鄭重澄清嗰個唔係我個Friend，同佢冇聯絡，唔會令我好上心。」問他如何看此事？他表示現時只是調查，不會作評論，坦言只擔心平日有飯敍的高層何麗全，幸而對方沒有牽涉。
應該唔會咁易犯錯
對於陳志雲被捕事件，Vinci又單單打打地說：「我同啲朋友傾開，佢之前做過政務官，喺傳媒打滾咁耐，應該唔會咁易犯錯，好奇怪！（覺得佢為人點？）唔熟佢為人，唔知！（八卦過今次乜嘢事？）有！聽講佢同助手開公司，用佢屋企地址登記。（覺得佢會唔會犯錯？）冇人話打份工唔可以有自己生意，但要分得好清楚，睇吓有冇牴觸！」問到會否希望對方冇事？他說：「站在一個觀眾角色，佢又係半個藝人、一個出色主持，唔想從此冇咗呢個人喺媒體出現，但作為關心TVB嘅人，當年離開我選擇講咁多，當然係不滿，TVB太多變化一朝天子一朝臣，可能TVB接受唔到我，如果有另一個人，會有更好景象。（咁講令人聯想你同佢不和！）擺到明係，唔使聯想！」他又坦言有無綫幕後工作人員找他做新節目嘉賓，他曾問對方：「唔怕有人唔鍾意咩？」對方答他：「依家唔使理！」問他若返無綫會否感吐烏氣？他說：「我唔會覺得我永遠喺TVB消失，亦冇人可以喺TVB做一世，呢樣係指我同陳志雲！」
暗寸有人面面俱圓
袁彌明則說：「ICAC拉人唔會冇證冇據，如果用拘捕嘅字眼，應該有充分證據，總之有做過嘅人就有做，冇做嘅人就冇做。」談到陳志雲為人，她說：「我唔知呀！有啲人面面俱圓，我冇話係邊個呀！（TVB今年好多事？）無綫用人不善，我冇講係邊個，咁多層出事，連鎖關係嚟！總之其身不正，拜乜神都冇用。」
無綫封嘴，身為包薪藝員的佘詩曼昨午到中環歎茶，對於陳志雲被捕等提問，她只笑着擰頭。而薛家燕表示對事件感到愕然，希望是誤會，希望他沒事，她又大讚他為人正直及幫手做義務工作，她透露前日與對方通電話，陳志雲答應會出席她後天（14日）的六十歲大壽派對，更表示會跟她唱歌。另外，曾志偉昨日傍晚現身電視城，離遠見到大批記者即轉身迴避，並叮囑司機轉到停車場等候，記者告知停車場同樣有大批記者，他遂放慢腳步：「我啱啱落機，乜都唔知。（搵過錢國偉？）佢返嚟未？我都未知咩事，要了解吓！（向樂易玲了解？）未問！個個都開緊會。（點睇呢件事？）我諗唔會啩！（咩意思？）唔會有呢個問題！」