早排小小So喺中環蘇豪區行街，見到有個幾高、又化晒妝嘅女仔拉住個篋急急腳咁走，個篋仲縛住咗張航空公司嘅行李牌，之後小小So先發覺原來佢係無綫小花何傲兒，唔講仲以為係空姐趕搭飛機添！
小小So：你咁趕，又要出Trip呀？
何傲兒：唔係呀！我趕住去做訪問呀！
小小So：咁做咩要拖住個篋咁麻煩呀？
何傲兒：個篋我要嚟裝衫o架！每次訪問我都帶好多套衫同鞋，又要自己化埋個妝，咁多嘢好難拎，所以我次次都拖篋，呢個已經係我最細嗰個。
小小So：我頭先遠睇仲以為你係空姐添！
何傲兒：真係？其實我真係諗過做空姐，不過最後揀咗選港姐，算係圓咗我18歲前嘅一個願望！
新人親力親為梗係好，小小So都忍唔住要讚傲兒乖女，唔怪得佢呢排咁多工作啦！同埋佢都幾慳家，個Hello Kitty篋都係玩電視遊戲節目贏番嚟o架！