混血名模Mandy Lieu與台灣男星陳柏霖拍拖三年，一直表現恩愛，幾乎談婚論嫁。雖然各有各忙，經常分隔異地，但仍無損兩人感情。不過去年五月，柏霖被拍得與台灣女星桂綸鎂，在台灣行書店兼月夜漫步，即惹來劈腿之嫌！雖然Mandy力撐他絕無偷食，但已令戀情火速轉淡，近日桂綸鎂更在Blog中吐露玄機，暗示與跟她年紀相差十八年的戴立忍分手，令這段「四角戀」更加立立亂。「劇情」到昨日又有突破性發展，Mandy自爆與柏霖已分手，難怪她於本月初被本報拍得與女友人悶食Pizza，相信是治情傷！

「仲係好好朋友」

Mandy昨日出席Salvatore Ferragamo香水活動時表示，將留港度歲，幸有契媽來港陪伴。問到柏霖是否也來港陪她時，Mandy起初只表示他要拍戲沒有假期，但經記者再三追問下，她猶豫一會後才說：「我哋分開咗！係我哋兩個人嘅決定！原因我唔想講太多，但仲係好好朋友！（因長期分隔異地而分手？）可能係！」

記者繼續追問是否感可惜，Mandy木無表情地說：「總之我哋係好Close嘅朋友，冇第三者，仲好尊重對方，仲係好好朋友！」Mandy透露情人節有契媽陪伴及行花市，不愁寂寞！問到會否希望新一年覓得新男友？她說：「冇諗喎！其實我慢慢會慣，希望每日生活有多變化！」她強調從未講過非柏霖不嫁。

對於Mandy單方面宣布分手，柏霖卻毫不知情！本報昨日致電其經理人公司，發言人說：「有咁嘅事！係咪亂寫？佢依家喺台灣，新年會陪爹哋媽咪，跟住返內地拍戲！」但當得知 Mandy親自公布消息，發言人即轉口風：「係咩？等我問番佢！」他及後指未能聯絡柏霖，承認很久未見過兩人在一起，可見分手已成事實，但兩人口供不一，顯然沒有就公開分手而達成共識。

Mandy Lieu（24歲）

身高：170cm

三圍：32、24、34

緋聞男友：陳柏霖

認識陳柏霖：2007年

桂綸鎂（26歲）

身高：164cm

三圍：34B、23、34.5

緋聞男友：戴立忍、周杰倫、陳柏霖

認識陳柏霖：2002年