無綫人氣主持崔建邦與中巴混血模特兒鄺敏慧月前傳出緋聞,但一直未肯認拍拖,但昨日因一宗毆打事件而爆出兩人情侶關係!昨晚本報收到消息,崔建邦涉嫌襲擊緋聞女友鄺敏慧,女方事後到律敦治醫院驗傷,隨即往灣仔警署報案。
據消息指,鄺敏慧昨日向崔建邦提出分手,全因不堪男友風流及講大話而大感失望,故決定斬情絲。情不在,男方向女友提出刪除拍拖時的情話短訊及熱戀合照,惟恐密照被公開,但女方表明只作留念不作公開而拒絕刪除。此時,有人情緒激動,出手叉鄺敏慧頸推撞及大力打了她頭部一下,並迅速搶走她的電話及刪除密照與短訊。鄺敏慧因而返回其模特兒公司哭訴,在公司建議及陪同下報警求助與驗傷。
「估唔到佢咁冇人性」
昨晚,鄺敏慧由模特兒公司老闆及工作人員陪同下,到灣仔律敦治醫院驗傷,逗留醫院約一小時。約八時十五分,她由特許人員通道離開,坐上CID車輛到灣仔警署錄口供,其後向傳媒講述事發經過:
記:記者 鄺:鄺慧敏 F:Frankie
記:你邊度受傷?
鄺:條頸好痛,畀佢箍到,手同腳都好痛。
記:有乜爭執?
鄺:同男友有啲拗撬。(邊方面?)感情方面。(幾時?)今日下午。
記:係咪男友屋企?
鄺:係。
記:你男友係咪崔建邦?
鄺:係。
記:當時傾乜?
鄺:講緊分手。
記:邊個同邊個講?
此時,鄺敏慧身邊的模特兒公司老闆欲中斷訪問,指她現時感不適及要趕住落口供。逗留警署約兩個半小時後,鄺敏慧由老闆及同事陪同離開警署,即被三十多名記者包圍,被問到事發經過:
鄺:今日下晝嗌交,我想走,但佢想要番我哋啲相同啲SMS。
記:乜相?
鄺:情侶相。
記:點解要攞番?
鄺:因為佢唔想公開我哋關係,之前我唔認都係想幫佢,想保持佢嘅知名度,估唔到佢咁冇人性打我。(此時鄺忍不住落淚)
記:之前有冇打過你?
鄺:之前佢已有暴力傾向。
記:今日點打你?
鄺敏慧模特兒公司老闆Frankie代答。
F :崔生用手打佢個頭,佢企唔穩就跌落地,箍住佢條頸。
記:點解咁緊張,係咪有情慾照?
F :冇。
記:係咪講分手?
F :開始嗌交,不過依家梗係分手。
記 :一齊幾耐?
F :八月開始一齊。
記 :你係咪介入崔建邦同唐詠詩關係?
F :當時佢哋已分手。佢真係好頭暈,你哋畀佢休息。
記 :要唔要驗吓個腦?
F :呢啲唔講住。
記 :父母知唔知?
F :已通知咗,依家送佢返屋企。
記 :崔建邦有冇打嚟?
F :我叫佢熄電話。
之後就與鄺敏慧匆匆上車離開。
事件曝光即熄手機
涉嫌打人的崔建邦昨日在鄺敏慧未正式報警時,有消息指崔建邦與鄺敏慧街頭遇襲送院。當時記者第一時間致電崔建邦,他淡然回應:「冇啲咁嘅事,我今日成日都喺屋企,根本冇出過街。」他還說笑是否一個「同名同姓」的誤會。不過十五分鐘後,有人傳真鄺敏慧指控崔建邦打人的消息致報館,記者再致電崔建邦,他已將電話轉至留言信箱,截稿前仍未回覆。
崔建邦傳出涉嫌毆打女友鄺敏慧一事,迅即成為網友熱話,不少網友指崔建邦涉嫌打人,相信會影響事業,更有網友封他做「新拳王」:「學咩拳?」亦有網友以為崔建邦仍是與唐詩詠拍拖,網友牛子說:「仲以為佢係同唐詩詠添,世界變得太快。」
參加《十人巷》入行
姓 名 ︰鄺敏慧
英文名 ︰Elizabete
花 名 ︰中巴
出生日期 ︰1989年12月13日
年 齡 ︰20歲
身 高 ︰165cm
三 圍 ︰32、23、34.5
入行經過 ︰
經朋友介紹加入模界,曾與古天樂拍戲,今年參加森美主持的電視節目《十人巷》而入行。今年加入模特兒公司HK Genesis,與崔建邦傳出緋聞而為人熟悉。