無綫《萬千星輝頒獎典禮》獎項塵埃落定，視帝黎耀祥及視后鄧萃雯眾望所歸，連早前被捧為視后大熱的楊怡亦冷手執獎，連奪「我最喜愛的電視女角色」和「最佳表現大獎」，難怪前晚楊怡出席頒獎禮後，在電視城門外與近30名Fans開香檳慶祝，Fans拉起「光芒無限、實力非凡」橫額兼放花炮，比起只有20名Fans撐場的雯女更具聲勢！未能憑《宮心計》奪得視后、只分得三枚「最後五強」金牌的佘詩曼，零Fans撐場！而同樣未能憑《宮》劇稱帝的陳豪，則有忠心Fans於門外等候，總算有點安慰！

「今年我攞明年佢攞」

不過，楊怡得獎亦非人人讚好，有大批網友質疑她的演技，網友annex123認為「姚金鈴」角色又煩、演得又誇張，更有網友在無綫官網上留言替佘詩曼不值，覺得阿佘挾着《宮》劇和《絕代商驕》的票數，絕對不會比楊怡少，認為無綫為捧楊怡上位，變相要阿佘做「炮灰」，聲言要無綫還阿佘公道！不過，楊怡的Fans則力撐偶像攞獎冇問題。

此外，楊怡昨日帶點不適出席鞋履品牌分店剪綵，對於被網民批評不應攞「最喜愛角色」，她大方地說：「係好事，證明有爭議性，如果我同三好（佘詩曼）一齊攞仲開心，自己攞到網民心目中『最討厭角色』都係好事，冇唔開心，唔可以要求全部人鍾意我，相信佢哋唔係討厭楊怡，只係唔鍾意金鈴呢個角色！」至於「最佳表現大獎」被質疑是安慰獎，她持相反意見：「呢個獎更具意義，除咗表現外，仲代表操行、品格畀公司認同，係我入行11年嚟最大嘅鼓舞，希望下年再攞！就算呢個獎話係為我而設都好，攞到呢個獎尋晚瞓得好安樂。」對於宿敵阿佘食白果，楊怡戲言下年輪到她：「佢係我好姊妹，話要畀個獎我攞，我知好多人支持佢，但獎得一個，今年我、下年咪佢囉！（分豬肉？）唔係！個獎唔係畀錢買！其實《宮》劇攞唔到劇集獎有少少失望，但觀眾評價同收視都贏。」

嘉穎讚實至名歸

至於被網友力撐的阿佘昨日仍要為新劇趕工，她沒有留意網友的激進留言，反勸Fans要心平氣和：「每年賽果都未必令全世界人認同，好感激Fans支持，佢哋好乖好聰明，我諗好快會平復情緒。（網友質疑楊怡？）戥佢攞獎開心，自己從來冇希望，所以冇失望，我反而投訴楊怡冇嘴對嘴錫我，因為佢太激動喇！」另一套台慶劇《富貴門》因收視麻麻，前晚幾乎拉隊缺席頒獎禮，不過有份演出《富》劇的陳敏之亦戥好姊妹楊怡開心：「賽果全部Tip中，係民望嚟，戥楊怡開心，希望將來有機會成為佢！」而鄭嘉穎覺得賽果公平，同樣力撐楊怡：「第一次演反派算好出色、好大突破，做演員最重要畀到觀眾新鮮感，佢係實至名歸。」