「翻版楊愛瑾」Vicki因到髮廊剪頭髮，被邀請作Hair Show模特兒，早前到峇里島拍特輯，因玩滑翔風箏失控險生意外！
新進模特兒Vicki（曾進意）擁有一張明星臉，其中跟楊愛瑾（Miki）更有七分相似，Vicki說：「好多人都話我似佢，亦有人覺得我似陳文媛、楊秀惠同蔣雅文。」不過她跟大多「翻版」一樣，口頭上表示不抗拒稱號，心底裏還是想「做番自己」！
早前Vicki拍攝入行後的第一個平面廣告，雖然要保持敬禮Pose兼企直直多個小時，但她笑指戴上飛行眼罩後英姿颯爽，一個型Look已覺值得。
上山下海拍特輯
另外，Vicki早前到峇里島為雜誌拍攝旅遊特輯，「上天下海」的行程，對好動的她來說可謂合適不過：「即使每日瞓得幾個鐘，都係值得，記得有日凌晨點幾鐘起身去火山睇日出，雖然最尾睇唔到，但沿途嘅靚風景已經值回票價！」
不過旅程中卻發生一個小意外，玩滑翔風箏的Vicki失控撞落沙灘上，嚇得遊客四散，Vicki笑說：「其實應該學三日先玩，但我學咗三個鐘就玩，簡直係上咗個超級速成班一樣！」
花名多籮籮
身高173cm的Vicki，自言BB時期已經大隻過人，她笑說：「出世九磅，可能似媽咪骨架大，由細到大，返學都係最高嗰個。」由於身材高大，讀書時期的Vicki有不少花名，她說：「同學叫我『山東婆』、『巨人』、『大隻妹』、『熊仔』等等，都幾好笑！」
Profile
名字：Vicki（曾進意）
生日：3月21日
身高：173cm
三圍：33B、24、35
公司：AModel
廣告：富邦銀行