雖然「一登龍門，聲價十倍」，但徐子淇待人態度依舊親切，好似早前佢喺公開場合撞到小小So，呢位「闊太」即時好熱情打招呼，向小小So詢問近況。雖然相機鎂光燈對住佢閃個不停，但佢依然未受影響，覺得「敍舊」最緊要！
子 淇：真係好耐冇見！
小小So：係呀。你忙緊乜？
子 淇：啱啱去完內地做慈善探訪囉！準備咗啲頸巾、書包送畀小朋友，不過我一定唔會買名牌囉！
小小So：點解？你能力一定負擔得起！
子 淇：因為我唔想氹到佢哋咁開心，但第二日冇又點呢？
之後子淇竟然親自「擔櫈」，叫小小So坐低傾吓偈。呢位「千億新抱」果然有禮，希望李家兩位小公主，日後都可以秉承媽咪呢方面嘅優點。