男人通常都鍾意車，好似天王郭富城咁，換車如換衣服最好日日新，連小小So個老友吳國敬都一樣！不過佢換車就搞到一頭煙，嬲爆！
吳國敬：好激氣！你幫我評吓理喇！
小小So：乜事呀？
吳國敬：前排我去車行用自己個名買新車，車行個經紀話幫我搞埋保險，點知簽買賣合約時，突然問我過去三年有冇扣分？我話有，隔咗三日，佢話唔受保，我依家有車冇得揸，買架車嚟做乜？
小小So：咁點算呀？
吳國敬：我惟有搵律師幫手，我覺得個經紀有欺騙成分，存心引導我買車，真係好激氣！
小小So：架車幾多錢？
吳國敬：九萬幾蚊！搞到我車又唔揸得，日日Call的士，搵唔到辦法解決，仲要罰萬幾蚊畀車會，我都唔知點算，擺明蝦我，以前用公司名買車冇問題，最衰自己唔識，原來停過牌唔受保，車行應該有責任解釋。