一班師兄弟打拚到今天，成就最為卓越的應非成龍莫屬，卻原來在七小福當中，他亦是鶴立雞群的一位。到底成龍如何突出……並非身手、並非天資，而是特殊的「契仔」身份，成龍說：「嗰時我嘅身份都幾特殊(口架)！一來我係師傅契仔，同佢食過飯，二來我識講法文同英文，個樣望落去有啲外國人血統，又成日有啲古靈精怪嘅西洋嘢食，又有個英文名叫Jackie，嗰時佢哋個個都叫我做『御兒乾殿下』。」

以為學人騰雲駕霧

由於父親與于師傅稔熟，成龍加入中國戲劇學院前，曾跟着父親與于師傅會面，順道參觀七小福的練功情況；就是因為那次參觀，成就了成龍武打巨星的命運。當年只有六歲半的成龍，對於七小福「萬眾一心」練功夫的情景印象極為深刻，亦因為這次「偶遇」，他便立定要跟隨于師傅習武的決心。

成龍重提舊事，情緒高漲的說：「嗰時阿爸同于師傅好熟，有日阿爸帶我去于師傅度，我見到好多着住白Tee黑褲嘅人練功，佢哋個個好似華山論劍咁騰雲駕霧，搞到我即刻鍾意咗功夫。」

備受眼前墟冚練功場面「迷惑」的成龍，除了即時有衝動加入七小福外，還爽快答應簽下最長的生死約，足證當年他對學武的那腔熱誠：「當時有人問我簽幾年合約，佢哋話有三年、五年、七年同十年畀我揀，咁因為我覺得好好玩，所以咪好豪咁話：『簽十年！愈多愈好！』」

糊塗拜師三毛偷笑

不過成龍的美夢，很快便隨着殘酷現實成泡影，即使事隔數十年，他還是十分後悔，只單憑表面觀感作了一個如此衝動的決定：「如果嗰陣一早知道咁辛苦，我一定唔會參加啦！我以為好玩先去(口架)咋！依家諗番起，終於明白點解當日洪金寶（三毛）會對住我係咁奸笑，原來佢嘅意思係『你入到嚟就知？』初初我仲以為佢好歡迎我，後尾終於知道真相，哈哈！」

小朋友個個都頑皮透頂，成龍、洪金寶、元華等一班師兄弟又豈會例外，勤練功之餘亦總愛四出搗亂，在師傅、師母眼底下仍是古靈精怪，極盡搗蛋的能事，尤其這個成龍，明知做師傅的契仔從沒有特權，但依然不理三七廿一，每天不弄個翻天覆地不罷休……