無綫處境劇《畢打自己人》受一眾上班族歡迎，飾演集團高層嘅歐錦棠，佢嘅留鬚Look好有新鮮感，亦將阿棠嘅功夫形象轉型，變得好有優皮老闆嘅味道。
阿棠跟小小So講，佢都好鍾意呢個造型，仲話自己從演以嚟，造型變化唔大，今次大膽留鬍鬚，可謂一個突破，連同劇拍檔毛舜筠都大讚有型，所以，阿棠曾向小小So保證，會Keep住留鬚做型佬！
不過，阿棠日前打畀小小So，電話筒傳嚟嘅聲音猶如晴天霹靂，因為佢已經被迫剃咗鬚，至於點解？阿棠話：「因為《畢》劇監製唔鍾意，覺得唔好，要求我剃咗去，我為咗配合個劇，只好依從監製意思，毛姐知道都戥我唔抵，我剃鬚當日，好唔捨得，好似人哋落髮咁，惟有影張相留念啦！」