本文重點
緋聞男女房祖名同薛凱琪將再度合作拍戲，佢哋尋日率先大耍花槍，祖名仲話驚雙方有親熱戲，怕心臟負荷唔到！
祖名無懼緋聞，再同薛凱琪（Fiona）結片緣，尋日仲雙雙出席新片《BREAK UP CLUB》試鏡活動。導演黃真真踢爆Fiona話只要祖名肯演出，佢亦都OK，嚇得Fiona 9秒9澄清：「梗係唔係啦！因為之前同導演合作得好開心，今次劇本好得意同新鮮咋！」
拒分享私生活
片中飾演攝影師嘅祖名揚言，會加入個人戀愛經歷，問Fiona會唔會提供個人經歷？祖名即搶答，話佢唔鍾意公開私生活，Fiona亦話：「我個角色都唔使分享愛情經歷，只係做祖名女朋友！」祖名仲笑Fiona用替身拍笨豬跳戲份，搞到Fiona鬼咁尷尬！
至於會唔會有親熱戲？祖名笑笑口話：「我諗應該會有啩？不過我會叫導演減少啲，因為我驚心臟負荷唔到呀！（你哋平時都拗頸㗎？）係呀！因為好少見，所以一見面就好多嘢講！」