慾女回歸

今日我好準時9點鐘返到公司，不過老細Richard仲早過我，佢一見我返嚟，就立即走出房，用好憐憫嘅眼神望住我，我實在一頭霧水：「我今日個妝出咗事呀？點解你咁樣望我呀？」佢望住我，然後用好溫柔嘅語氣同我講：「放心啦！就算化得淡啲，都唔係好覺你有病啫！」我立即瞪大眼：「啋！邊個咁黑心咒我有病呀！」佢立即拖住我隻手：「我知道好多人初期都唔接受自己有Cancer，但慢慢就會面對到，況且依家醫學咁昌明，你一定會大步檻過嘅！」

我立即縮手：「究竟邊個傳我生Cancer，我只不過諗住禁慾3個月，調理身體啫，使唔使咒我咁惡毒呀！」Richard望住我一臉疑惑：「你禁慾3個月？我覺得呢件事仲難相信過你有Cancer喎！」我立即大笑，佢真係一語道破咗我嘅人生，我點可能禁慾3個月吖，如果真係可以，我就唔係Lady Barbara啦！簡直畀佢一言驚醒夢中人，我決定由今日開始，重出江湖，唔止要追番之前浪費嘅時間，仲要重燃我內心嗰團旺盛嘅慾火。

我長話短說咁樣將事件嘅來龍去脈講畀Richard聽，好唔容易先將佢打發咗返房，有時候我覺得自己似一個男人多過佢。不過有個咁溫柔嘅老細都好嘅，起碼工作上可以輕鬆一啲，唔需要提心吊膽。放工嗰陣，樓上Macy嘅電話又到，佢啲Timing永遠都夾得好準，真係令人不得不佩服：「喂！人哋話你生Cancer喎……」我立即打斷佢嘅說話：「唔使講咁多，今晚一於不性無歸，我已經約咗好多仔出嚟，有興趣就10分鐘後大堂見，拜拜！」（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。