世界波：高潮直通車同步過終點

女人嘅性高潮一向比男人嚟得複雜，而事實上又有好多男人都睇唔出，伴侶嘅高潮到底係真定假；仲以為自己好威猛，原來只係伴侶為咗顧全你嘅面子而偽裝。其實長此下去，對雙方都冇好處，不如諗諗辦法，喺性事上作出協調，搵出通往高潮嘅「直通車」，齊齊拖住手仔過終點咪一樂也囉！

美國有性學專家指出，女人嘅高潮係人類最反覆無常嘅行為之一，唔好講話男人掌握唔到，連女人有時都把握唔住。既然係咁，想一齊過終點，咪難過登天？難度的確係有，但正所謂「萬事起頭難」，一旦行出正確第一步，就可以順利長驅直進，以下幾點，就係搭上「高潮直通車」嘅關鍵。

讓女人爽先

同步過終點，的確係性愛中令人興奮嘅結果，但男人未能做到之前，不妨先攞出紳士風度，讓女人爽先。特別係陰蒂超級敏感嘅女人，會對「Lady First」這條守則作出好好嘅反應。所以喺前戲時，不妨落力一啲，令佢先來一次高潮。事關女人獲得第一次高潮之後，再進行真正嘅活塞運動，好容易就會出現第二次，甚至第三、第四次高潮，咁樣就大大增加咗同步過終點嘅機會啦！

忘記時間

好多男人都只會專注於自己如何再堅持耐啲，但卻冇真正了解女人係咪因為時間長咗，就一定可以得到高潮；而女人見到伴侶咁努力衝刺，惟有扮吓高潮迭起。所以時間長，並唔係引發高潮嘅主因。

最近瑞士一項針對腦部影像嘅研究發現，放鬆係令女人達到高潮嘅重要因素。所以男人只要可以令女人快活到忘記時間，咁無論時間長短，高潮都會較易出現。

讚美說話

對於女人嚟講，讚美嘅說話絕對係一種靈丹妙藥，尤其是出自愛人口中，就更加能令女人樂上半天。所以男人不妨喺性愛過程中讚賞女伴嘅身體，呢種做法猶如一種心理春藥，會令女人感覺飄飄然，更易走上高峰。最近瑞士一項科學研究亦顯示，對自己身體冇自信或感到難堪嘅女性，比有自信嘅女性，高潮少一半。好明顯，讚美女人都係高潮關鍵。