玩社交網站後遺症
社交網站大受歡迎，瀏覽社交網站已成為大部分人嘅生活習慣。老實講，有咗社交網站，大家要溝仔溝女方便好多，只要搵到目標對象嘅帳號，就可以將對方極速起底，睇吓佢平時有咩留言，同咩朋友來往，最重要係知道佢係咪單身，小弟就係咁樣知道好多目標異性有男友，早早結束暗戀或單戀日子。
美國一個約會網站「OkCupid」早前進行咗一項調查，結果發現經常上社交網站會影響情侶間感情，甚至會分手收場。該網站透過網絡訪問咗大約100萬名男女，發現當中經常玩社交網站嘅受訪者同伴侶嘅感情關係麻麻，相反唔玩社交網站嘅男女則表示跟伴侶感情恩愛。咁又係，大家將自己嘅最新動態放晒上網，男伴或女伴唔使搵你都知你做緊乜，見到面嘅時候，彼此之間仲有乜話題好講呢？感情關係自然麻麻，最後咪分手收場囉！