關愛乳房 男士更踴躍

每年十月，內地都列為「關愛乳房月」，各地都會自發性舉行防治乳癌嘅活動，而早幾日喺河南鄭州嘅二七廣場，就出現咗四位性感靚女，喺鬧巿中進行乳癌防治嘅問卷調查。本來做問卷調查係一件好普通嘅事，但特別在呢四位靚女，竟然以泳裝示人。

泳裝靚女 吸引途人

當日天氣轉涼，四位穿泳裝嘅靚女，性感有餘，卻添衣不足。有途人做完問卷之後向記者表示，靚女們凍到起晒雞皮，連寫字都忍唔住不停打冷震，都唔明點解要咁做。

呢件事喺網絡上引起好大回響，有網民怒轟做防治乳癌宣傳，對象應為女性，何解要賣弄女性胴體嚟引人注意？主辦單位則解釋，咁做只係想吸引多啲人填問卷。但現場所見，雖然圍觀途人眾多，但肯做問卷嘅女性少之又少，最後班泳裝靚女為湊夠數，只好拉住啲男人做問卷，完全係本末倒置。

是次事件，唔少傳媒都以「乳癌問卷調查，男士踴躍作答」為題做報道，後來有網民發現，原來今次活動，係由當地一間整形醫院贊助，派出泳裝靚女做乳癌問卷，可能係想令人覺得，萬一遇上不幸都可以靠整形補救，利用「關愛乳房月」來推廣整形服務，我覺得「超錯」囉！