最近內地搞咗唔少迎接亞運嘅活動,可以話一浪接一浪,好似上個月就搞咗個全國亞運啦啦隊選拔大賽,嚟自全國8間大學嘅啦啦隊,齊集廣州進行較量。網友睇過比賽之後,竟然批評多多,話啲啦啦隊賣藝、賣肉之餘,仲賣埋命添!
性感上陣
今次呢個啦啦隊大賽,原來由舊年就開始籌辦,搞咗成年,吸引到68個城巿、363間大學,派出1,014支隊伍參賽,總比賽人數高達20,182人。到總決賽當日,只剩8間大學嘅隊伍角逐冠軍,而最後由自己友廣州體育學院嘅同學勇奪全國總冠軍。
網友睇完比賽之後,並唔係話佢哋做馬,偏幫自己友,反而大讚8隊參賽隊伍。佢哋除咗跳得出色之外,唔少女大學生都賣肉演出,個個性感度都爆晒燈,低胸、熱褲、迷你裙等服飾,成為每隊嘅象徵,想搵隊囡囡着得密實啲嘅都幾難。
賣命演出
但網友批評得最多嘅並唔係女大學生嘅性感形象,反而係話佢哋嘅演出過分出位,有啲環節同玩亡命雜技差唔多。例如比賽中出現空中飛人,720゜前空翻、後空翻,可以話係指定動作,有隊更玩到1,080゜連續空翻,比馬戲團表演仲要令人震驚。
以高難度亡命表演嚟做評分標準,有好多網友都認為失去比賽原意,因為參賽嘅並非特技人,而係大學生,好多仲係臨時拉伕參賽,點解要助長亡命演出呢?萬一有意外又由邊個負責呢?