鼻樑生得好高好直，但兩邊生得好窄，正面望過去就好似劍鋒一樣，相書稱呢種鼻為「劍峰鼻」，亦即係「窄鼻」。有呢種鼻嘅女性原來特別易受異性歡迎，身邊追求者眾，有咁大吸引力，原因係呢種人嘅性格內向，成日楚楚可憐咁樣！
佢哋做事失魂，欠缺自信，對物質生活一啲都冇追求，唯一好處就係毅力十足，從事刻板苦悶嘅研究工作，絕對適合。好多研究中心嘅女性，都係「窄鼻」嘅囡囡，男人見到佢哋都不期然會由憐生愛，所以追求親佢哋嘅往往都係好男人。
但咪以為佢哋嘅婚姻生活一定會好美滿，由於佢哋做人從小就欠缺自信，而且身邊嘅老公又實在太優秀，反而會搞到佢哋成日胡思亂想，小小事就會疑神疑鬼，擔心丈夫有外遇，經常問長問短，醋意十足，絕對係一個喜歡無中生有嘅醋娘子。