嚴密入場

居於西安嘅老張表示，早前於網上睇到一個人體攝影加模特兒選美比賽嘅廣告，對於喜愛攝影嘅佢覺得相當吸引，所以決定參加，並於網上辦理登記手續，以及繳付五百元費用。

活動舉行當日，老張按照指示到達會場，佢話：「當晚我去到一間高級會所，喺門外由工作人員核對身份才可進入會場，相當嚴密。入到場，發現場內搭咗一條有如模特兒行『貓步』嘅天橋，兩邊擺放咗椅子，但座位數量唔多，大概只有二十個。坐咗一陣，場內響起音樂，十幾位性感模特兒就輪流出場，睇靚女之餘，我梗係唔執輸影番幾張靚相啦！」

裸女任影

呢個人體攝影加模特兒選美比賽，當然唔少得泳衣環節，睇見一眾索女着住三點式泳衣，在場人士即變得情緒高漲，不停歡呼。而喺泳衣環節完結之後，大會司儀就宣布休息二十分鐘。

此時，老張突然見到啲模特兒從後台走出嚟，最令人驚訝係佢哋個個都赤裸裸咁走入人群之中，並向在場觀眾投懷送抱，有人見狀乘機抽水，亦有人把握機會，拍攝大特寫，場面混亂又荒唐。

之後，老張從其他攝影發燒友口中得知，原來呢個人體攝影加模特兒選美比賽，背後係由一個賣淫集團操縱，而所謂嘅模特兒，其實係附近夜場工作嘅小姐，如想同索女有下文，就要額外付上一筆費用。不過，老張只對攝影有興趣，所以佢冇同索女有進一步接觸便離開會場。