黃梓浩真人是一名正宗「怕羞仔」,但自言「唔識講嘢」的他落到球場卻判若兩人,全因對足球的熱愛,即使所住的石澳無正規球場,要到爛地、沙灘踢波,仍無損他對足球的堅持。

爛地 沙灘照踢波

「王子」今季入波後慶祝往往非常激情,但踏出球場之後,卻是個內向害羞的大男孩,訪問期間,緊張之情流露於手指打圈等小動作,一臉腼腆的他苦笑道:「我好怕羞,唔識講嘢……之前有次做訪問要影相,搞咗好耐。」到底場內場外的他為何會判若兩人?「因為我好鍾意足球,自細開始每日都要掂吓、玩吓足球,否則會唔安樂,我見足球見得比屋企人更多。」

儘管非常熱愛足球,出生、成長於石澳的他,小時候並沒有平整的場地可踢波,依然無損他的熱愛:「有一塊爛地,會同朋友喺上面踢,另外都會去沙灘插拖鞋當係龍門咁踢。」石澳不缺海灘,「王子」從小開始已經常接觸水上活動,卻從未想過要成為水上運動員,皆因只有足球才是他的至愛。