知識未必能夠致富，卻可充實人生。元朗中場葉頌朗寒窗苦讀6年，去年完成香港理工大學工商管理學士學位後，繼續迎難而上，攻讀碩士課程。即使在球場上被撞至脾臟撕裂，仍咬緊牙關趕赴試場，寧願「搵命博」，又堅拒走捷徑換證書。「阿朗」斷言：「金錢買唔到知識，呃自己冇意思！」堅持到底的毅力，或許正是所謂波牛的牛味所在！文：徐嘉嘉

葉頌朗早在中學學界年代已踢出名堂，那些年曾在「學界皇馬」董之英並肩作戰的楊賜麟、翟廷峯、杜瀚滔、黎耀昌等，如今仍在港超默默打拚，但能夠兼顧讀書升上大學，卻唯獨「阿朗」一人。「諗番起都覺得不可思議！父母常提醒我追夢係可以，但亦要畀心機讀書。會考10分僅僅讀到中六，到高考也只有2個E。當時身邊好多人覺得我讀完副學士再讀大學，未必可以順利畢業。」有人用兩個月「完成」大學學位，阿朗付出6年心血，方可戴上四方帽。不走捷徑，惟有堅持：「有時上晝練完波下晝上堂，好容易瞌眼瞓，體力與精神雙重透支。好彩這幾年來的教練，像太陽飛馬的Cow Sir（陳志康）及南區、元朗時的馮Sir（馮凱文），對我非常體諒，願意協調操練時間。一班好同學又幫手『Jot notes』，知我計數唔叻，同我做past paper補習。我畢業的GPA有2.9幾，都叫過得去啦！」

脾臟撕裂堅持考試

最難過的，早已跨過。笑看寒窗苦讀辛酸史，阿朗才醒起自己曾暈倒試場！「有次踢預備組被對手踢到脾臟撕裂，翌日卻是高考模擬試，我睇了急症後偷偷返咗屋企，結果喺試卷寫完個名，就已經痛到暈咗。」一紙證書搵命博，值得嗎？阿朗想起兩位前輩的忠告：「黎Sir（黎新祥）及曾Sir（曾偉忠）不只一次提醒過我們，要為自己定下目標，若足球事業在奧運隊過後也冇乜起色，不如早點『休息』。若要轉行，起碼有個學位亦較易投身社會。不過自己對政府架構同商業管理也有興趣，讀讀吓真係開咗竅，依家有時都會額外睇書增值。」

打針治腿筋發炎痛到爆炸

阿朗曾立志在大學畢業後投考督察，卻難捨足球情意結，即使近季效力的皇室南區及太陽飛馬也散班收場，始終仍堅守球場：「夢想可以堅持得幾耐就幾耐！現在我的碩士課程一星期才返三晚，比以前輕鬆好多。」阿朗今季轉投元朗攻入兩球，周日更建功協助球隊「開齋」，將帥上下喜極而泣。這些淚水，有感動，也有痛楚：「其實我在這年半一直也受腿筋發炎困擾，上星期打了支血清針，一拮落去條筋嗰下，嘩！痛到爆炸，唔知痛唔痛得過生仔？」男人最痛也頂得住，更何況讀書壓力。莘莘學子，可別輕易放棄。