夢想駿其冇「朱基」一樣掂！有隊長朱兆基離隊的夢想駿其，昨日作客香港大球場發威以3:0輕取香港飛馬，當中只得21歲的黃梓浩及20歲的鍾偉強有波入，繼續煥發青春力量。

夢想駿其大勝，香港飛馬外援迪亞高（左）勁失望。

夢想駿其賽前有隊長兼教練朱兆基轉投南華，正選陣容僅得福田健二及柏保路兩名外援。面對同以本地新星掛帥的香港飛馬，兩軍於開賽初段戰情膠着，戰至上半場補時，38歲的「福田San」接應梁國威長傳起腳射遠柱，協助夢想駿其領先1:0。

利馬報復領紅

香港飛馬易邊後攻門仍然寥寥可數，戴上隊長臂章的利馬更於76分鐘報復推跌駿其小將謝朗軒，遭球證直接出示紅牌驅逐離場。夢想駿其乘勢以眾凌寡優勢，於86分鐘再由黃梓浩接應角球頂成2:0，20歲的鍾偉強補時再接應謝朗軒右路傳中頂成3:0「埋齋」。夢想駿其賽後壓過香港飛馬，升上聯賽榜第4位。

取得職業生涯處子入球的鍾偉強激動得眼濕濕：「朱Sir（朱兆基）去季在駿其天旭開始已對我悉心栽培，我會一直記得他的教誨。」至於香港飛馬跌至聯賽榜第6位，教練李志堅直言利馬報復行為不智，球隊整體發揮亦未如理想。被問到會否擔心帥位前途時，「堅Sir」僅表示「唔會諗咁多」。