勇士昨日於聖誕大戰主場再鬥有路夫、艾榮復出的騎士，合演總決賽翻版。主隊王牌史堤芬居里今仗帶傷上陣，仍帶領勇士以89:83擊敗騎士。勇士贏波，但咖喱仔卻被前教練馬克積遜批評打法教壞小朋友，隨時摧毀籃球下一代！

勇士史堤芬居里（左）末段單挑壓倒騎士勒邦占士，成為大戰焦點。（美聯社圖片）

居里小腿輕傷，今戰表現受影響，全場只得19分，上半場7射僅2中，更一度離場接受治療。不過，第4節末段他大發神威連取4分，為球隊奠定勝局。勇士前鋒積蒙格連亦交出22分、15個籃板球及7次助攻的高效率表現，讓球隊全場Lead住「三巨頭」齊腳的騎士，成為球隊贏6分的一大功臣。勇士現時戰績29勝1負，美國傳媒再次熱議球隊能否挑戰公牛的72勝紀錄，以及居里對籃球的改變。

前教練轟居里教壞細路

前教練馬克積遜卻認為咖喱仔教壞細路，更在今仗為電視台旁述時，忽然狠批居里打法：「居里傷害緊籃球，我喺高中比賽見到啲細路打波，全部都想射3分。小朋友，你唔係居里，去練下基本功先啦。」咖喱仔不以為然，笑着回應：「如果你射得入，咪繼續射囉。如果射唔準，咪唔好射囉。」

美國最大型的業餘運動組織AAU高層森摩西斯就力撐居里，認為後者讓更多年輕球員明白，就算身形矮小球員亦可躋身NBA，而且AAU旗下的籃球小將，學居里的運動技巧多於射3分，反指馬克積遜的指摘不實。