東方駿其兄弟兵齊齊W！巨型班東方與「同系」的夢想駿其昨在聯賽盃分途出擊，結果順利「起孖」，東方在B組以2:0擊敗香港飛馬，夢想駿其在A組以同樣比數戰勝灝天黃大仙，認真威水。

飛馬馮慶燁（右）快鄭少偉一步解圍。

聯賽盃B組大戰東方對香港飛馬在將軍澳運動場舉行，賽事在綿密天雨下進行，雙方均難以組織攻勢。開賽12分鐘，東方前鋒勞高睇準對方門將基斯贊企得太出，在中圈大腳笠射，皮球中楣底彈地入網，東方領先1:0，下半場香港飛馬傾力反撲，黃俊皓右路勁射中柱不入，轉頭東方反擊，李康廉博得12碼，巴域斯操刀射成2:0，全取3分。

「黑雙塔」簽名會大受歡迎

東方兩位港將基藍馬及法圖斯並無上陣，比賽期間舉行簽名會，為球迷簽名，現場大排長龍。東方贏波亦令B組出現3隊同分情況，標準流浪、香港飛馬及東方各贏1場，出線形勢緊湊。

傍晚在青衣運動場上演的聯賽盃A組賽事，夢想駿其對灝天黃大仙，上半場27分鐘，駿其小將黎洛賢突破對方防線，門前輕鬆射成1:0，下半場68分鐘駿其呂偉超禁區內遭黃大仙球員余沛康侵犯，本逃過球證法眼，但旁證示意黃大仙犯規，球證「吹番轉頭」紅牌驅逐余沛康，並判罰12碼，基奧主射破網贏到2:0，黃大仙僅餘10人應戰無力頑抗，最終駿其全取3分。