魯爾光榮收山！經過21年嘅光輝歲月，西班牙傳奇前鋒魯爾尋日正式退休，38歲嘅佢喺北美職業聯賽總決賽交出助攻，帶領紐約宇宙以3:2擊敗渥太華復仇者，以第23個冠軍獎盃嚟為自己傳奇生涯畫上句號。

擔任紐約宇宙大使

自94年為皇家馬德里披甲後，魯爾用大量入球換取一個又一個獎盃，即使離開皇馬轉戰史浩克04、艾薩德同紐約宇宙，魯爾去到邊都有獎盃落袋，21年足球生涯捧走23個冠軍，堪稱係人生大贏家！

昨晨北美職業聯賽總決賽係魯爾同前西班牙國腳辛拿嘅告別戰，唔少球迷都拉晒橫額入場歡送一代傳奇，完場後一眾隊友亦將兩人拋起，接受1萬名觀眾歡呼送別，場面感人。

魯爾賽後亦感觸表示：「除咗每個好重要嘅冠軍之外，所有球會、球迷對我嘅愛護，就係我足球生涯最佳嘅禮物，即使我唔會再比賽，但仍希望享受足球嘅樂趣。」據報魯爾將擔任紐約宇宙嘅大使，繼續貢獻球壇。