年度最佳爭唔贏美斯又如何 C朗自爆多女埋身好煩惱

狂讚自己高大靚仔

自從同伊蓮娜掟煲之後，大家都好關心C朗嘅感情生活，呢位鑽石王老五前晚接受英國清談節目《The Jonathan Ross Show》訪問時話，家陣有大把女爭住佢同一齊：「依家有幾個女人黐住我，佢哋都知有競爭，我知道當中有一半係為咗我嘅名氣先黐埋嚟。查實都好正常，我又高，棚牙又齊，身材又Fit，係名人煩惱嚟！」

嘩，直情收兵咁款喎！C朗有錢又有面係抵佢沙塵嘅，日前佢飛去倫敦出席旗下自傳電影《朗拿度》首映，傳媒踢爆C朗係搭佢用1,900萬歐元買嘅私人豪華飛機出動，呢架型號為灣流G200飛機係以色列出品，可以載8至10名乘客，最犀利係入面有齊衣櫃、雪櫃以及上網等娛樂設備，係女都想搭啦。講開C朗套戲，iTunes依家都有得下載，仲有中文字幕添，各位C朗迷留意嘞。

候選名單唯一足球員 美斯挑戰祖高域保特

喺C朗套戲入面，有一幕係美斯喺2013年金球獎頒獎禮開始前錫咗C朗囝囝塊面一啖，好鬼溫馨。C朗亦承認今屆金球獎係美斯囊中物，又難怪嘅，美斯上季帶領巴塞勇奪西甲同歐聯，尋日更成為唯一入選《體育畫報》年度最佳運動員候選名單嘅足球員，將會同網球手祖高域、S威廉絲同牙買加「飛人」保特等競逐殊榮，結果會喺下月14號公布，Fans可以喺網上投票。

另據《世界體育報》爆料，美斯已經秘密復操，仲喺練習賽有波入，目標直指喺「國家打吡」復出，巴塞特登唔公布消息，係想到時殺皇馬一個措手不及。