「英雄輝」平時喺球場左飛右撲，決斷力慢少少都唔得，究竟球場外嘅選擇題，阿輝又會點揀？

保方 Vs 卡斯拿斯

答：我鍾意保方多啲。保方除咗反應夠快，位置感亦係冇得頂，所以就算依家年紀大咗，表現依然咁穩定。不過我偶像其實係舒米高同雲達沙，佢兩個同保方一樣都係龍門長青樹，希望到我三十幾歲嗰陣，仲可以Keep到咁勁。

李健和 Vs 金判坤

答：「全盛時期」可以話係嚴厲得不相伯仲。不過近年兩位教練都收咗唔少火，Kim Sir經常鼓勵我哋唔好怕輸，李Sir教青年軍亦唔似得以前咁喪鬧，依家班後生仔真係幸福好多。

陳偉豪 Vs 李志豪

答：一定要揀一個做隊友？可唔可以兩個都要晒？呢幾年我哋幾個一齊經歷得太多，由東亞運金牌、廣州亞運、南華，我哋3個都喺後防配合得天衣無縫。雖然依家喺球會分道揚鑣，絕無影響我哋友情同默契。

東方 Vs 南華

答：南華係令我成長嘅踏腳石，畢竟踢南華嘅壓力同其他球隊係唔可以比較。至於我同東方則係特別嘅緣分，當年我喺東方只得18歲，依家雖然亦差唔多係全隊最年輕，但多咗隊長身份帶來嘅責任感。

黃翠如 Vs 唐詩詠

答：我又唔係洪永城？叫我點揀！其實我鍾意煲美劇多過睇港劇，不過兩個揀一個嘅，我會揀「翠如BB」，點解？因為笑得夠甜囉！