「我唔係英雄！」無論不厭其煩回帶多少次，「英雄輝」的名字，已與葉鴻輝畫上等號，但原來在隊友玩笑間，這位港足大門守護神，還有另一別號─「精神輝」。由初入球壇僅得5,000元月薪，到如今已是全港頂薪華將之一，如同「黐線」的認真態度，從未變改。只是橡根拉得太緊也會拉斷，阿輝全靠「百厭狗」Geoffery鍛煉EQ，哪怕對手使出「九狗久」口術，一於繼續冷靜接招！

東方/港隊門神 葉鴻輝

「英雄輝呢個名，我唔鍾意咗好幾年，我只係做番自己責任，足球要靠全隊努力，職員、洗衫、執波都有付出……」由9月「中港大戰」紅爆全城以來，葉鴻輝把以上對話重複又重複，就連傳媒訪問也推卻不少，不欲將光芒獨攬。「英雄」光環背後，阿輝笑言只是平凡宅男，懶得出街獨愛煲劇，這一年生活變熱鬧，全因多了活潑調皮的積羅素犬「Geoffery」相伴。「收養佢之前特別上網蒐集資料，雖然好多人都話積羅素犬好百厭，但我就喜歡向高難度挑戰。」

球場上屢救險球，偏偏教導小狗卻考起阿輝，家中護脛、波砵，不時變成Geoffery口中玩具。「教狗好似教細路，唔可以同佢哋角力，適當時候就要鬧，真係要好有耐性，一定唔可以躁。」看着Geoffery搖頭擺尾撒嬌，威風八面的「英雄輝」也難得柔情：「我平時好正常，只是一踢波就黐線！」

「對自己冇要求好快玩完」

一個「狗」字，令阿輝成為新聞人物，他無悔敢言作風：「我既然寫得上facebook，就要承擔後果。不過相比起以前，依家處事冇咁衝動，鬧球證都鬧少咗，因為鬧嚟都冇用。」自上季於東方戴上隊長臂章後，阿輝收斂躁火，即使港隊首席門神位置穩如泰山，自我要求依舊一絲不苟。「Hea」字？唔識寫喎。「運動員對自己冇要求就好快玩完！年輕球員容易被吹捧幾句就放鬆心態。或者係好勝嘅性格驅動我要好好保住位置，其他人都會進步，更加唔可以偷懶。」心態決定命運，回想17歲初登港甲僅得月薪5,000元，到今日薪酬十幾級跳，源於刻苦堅持：「我啲錢只用嚟食嘢，嗰時食個下午茶唔使20蚊。當初決定投身職業足球員，就要認真對待，定下目標20歲踢球會正選，23歲為港隊把關，估唔到條timeline全部早咗好幾年。」

盼球迷多入場支持

港足早年在廣州亞運、亞洲盃外圍賽虎頭蛇尾，聽得最多的是「請給港足時間」。近期港足氣勢如虹，阿輝認為最大進步是心態：「Kim Sir（金判坤）喺呢3年嚟，要求我們每場首要零失球，我們都不自覺被洗腦，就算贏唔到也要追和，唔可以輸少當贏。」心態改變，就連外界尊重亦是前所未見。「以前個個話踢波冇前途，依家出街會有fans鼓勵，坐滿西環街頭睇波，點會諗得到？」無奈聯賽入座率未見大幅提升，阿輝慨嘆：「明白到若非與國足同組，港足未必會備受關注。不少球會努力經營，像東方每場花盡心思宣傳，希望大家支持港足同時，球會賽事亦多多捧場。」