新招有罪？碧加狙擊費達拿！繼6月溫網前開名炮轟「費天王」扮好人後，祖高域教練碧加近日又鬧爆這位「瑞士一哥」，斥責其新接發球技術「唔尊重對手」：「如果費達拿喺我嗰個年代用咁嘅方式開波，可能佢對手回擊嗰陣，會瞄準佢身體打落去。」

衝前窩利抽擊回波

強勢打入美網4強的費達拿，最近採用一種新的接發方式，就是衝上前打窩利抽擊回波，上月在辛辛那提網賽冠軍戰，「費天王」正正就是利用這種技術絕殺了碧加愛徒祖高域，難怪他老人家「葡萄」又躁爆。

「佢咁樣接發球根本就唔尊重人，雖然所有人都會覺得只係一種戰術，冇違反球例，但我嗰代嘅球員係接受唔到嘅。」向來口沒遮攔的碧加無故發飆，勢加深祖高域和費達拿之間的矛盾。

女單方面，由於天雨關係，原定當地時間周四舉行的兩場4強戰延至周五上演，勝方球手翌日即要出戰決賽。