千呼萬喚,曼聯「三間」戰衣尋日終於上架,闊別23年重投adidas懷抱,當然要大搞啦!唔單止一眾戰將喺新鮮出爐嘅波衫廣告入面爆晒玻璃,英國更有舖頭半夜開工做生意,香港尖沙咀adidas旗艦店亦喺尋日同步發售,個勢好猛喎!

V領設計參照傑斯處子戰波衫

桑馬達、戴利白蘭特、勞基梳爾同舒韋恩史迪加等球星,喺廣告入面「o依嘩鬼叫」,個個都仲拎住支「魔叉」隊爆晒啲玻璃,真係「魔」性盡現。10間位於曼徹斯特同倫敦嘅專賣店,喺英國時間半夜踏入8月1日,就即刻開舖賣衫,新戰衣尋日亦喺香港同步上市,喺尖沙咀adidas旗艦店公開發售,唔少「曼聯躉」都第一時間殺去入手。

呢件新衫用上經典V領設計,肩膀位亦有三間圖案,設計靈感係源自1990年、亦即係傑斯處子亮相嗰年件波衫,「紅魔鬼」將會喺本月8號英超開鑼戰着住嚟鬥熱刺。不過,迪馬利亞相信都冇機會着呢件新衫,事關佢玩失蹤缺席季前賽之後,已經被會方罰款兩星期總共36萬鎊(約435萬港元)波糧,雙方關係進一步決裂。巴黎聖日耳門翼鋒盧卡斯洛迪古斯同中堅馬昆奴斯哥利亞,日前受訪時更話歡迎「天使」加盟,睇嚟迪馬利亞離開奧脫福嘅日子已經進入倒數。