「咖喱仔」兌現承諾，勇士暌違40年再奪冠！勇士昨日憑「咖喱仔」史堤芬居里及伊古達拿各攻入25分，作客以105:97擊敗騎士，總場數贏4:2，時隔40年後奪得總冠軍，「咖喱仔」兌現了2009年許下的承諾，而伊古達拿成為首名總決賽非必然正選的總決賽MVP（FMVP）！

勇士今季大熟大勇，奪得總冠軍實至名歸。（美聯社圖片）

伊古達拿一到總決賽即「上晒身」。（美聯社圖片）

勇士今戰要到第3節才可把比分拉開，領先12分，騎士最後一節決定放手一博鬥攻，可惜為時已晚，終以8分不敵勇士，只可在主場睇住西岸「1哥」捧起總冠軍獎盃。值得一提的是，「咖喱仔」曾在09年初入NBA時，向球迷許下帶領當時仍是魚腩部隊的勇士走上高峰的承諾：「向所有勇士球迷承諾，我哋一定會走出低谷。如果呢樣係我哋唯一可以做到嘅事，我哋一定會走上高峰！」

咖喱仔

兌現2009年承諾

如今兌現承諾，居里在賽後興奮得無法形容自己感受：「我都唔知講咩好，呢種感覺好難形容。諗番起我哋全隊今年咁努力比賽，可以成為總冠軍真係好特別。呢支係一支好球隊，理應成為史上最好球隊之一！」

周六勝利巡遊

總決賽另一大獎FMVP，就為今季轉任第6人的伊古達拿所得。伊古達拿今年在「新丁教頭」卡爾改造下，成為球隊第6人，到總決賽為了扭轉形勢於第4場才獲任正選，最終成為首位未在總決賽中每場擔正的FMVP。

勇士將會在香港時間周六舉行勝利巡遊，不過於勇士駐紮城士奧克蘭的球迷在賽後已經急不及待，上街大叫口號慶祝球隊在1975年後再次奪得總冠軍。