勇士率先躋身次圈季後賽！西岸新貴勇士強勢沒法擋，昨憑史堤芬居里交出「39+8+9」準三雙數據，作客以109:98砌低塘鵝，近40年來首次改制後橫掃對手。首圈季後賽場均攻入33.8分的「咖哩仔」，要首奪由記者投票選出的常規賽MVP殊榮，睇怕「冇走雞」咯！

居里（藍衫）勇不可擋，塘鵝三個都嘜唔住佢。（法新社圖片）

常規賽MVP大熱史堤芬居里繼續On Fire，昨仗命中6球3分波，全場交出39分、8個籃板及9次助攻，成為勇士以總比數4:0掃橫對手晉級的最大功臣。塘鵝球星安東尼戴維斯縱有36分、11個籃板及3次封阻的超級數據，奈何獨力難支，「咖哩仔」賽後亦識英雄重英雄，主動與「一眉狀元」攬頭攬頸，盡顯球星風範。

躋身次圈季後賽、將面對拓荒者與灰熊勝方的勇士，繼1975年季後賽改行7場4勝制後首次橫掃對手，當年球隊於總決賽以4:0大炒子彈隊（巫師的前身）奪得總冠軍，莫非今次「派蛋」是勇士奪冠吉兆？