「國泰航空/滙豐香港國際七人欖球賽」於3月27至29日假香港大球場舉行，屆時比賽激烈觀眾熾熱，現場氣氛肯定一流！球迷除了Enjoy這個嘉年華外，睇比賽都要投入，要投入當然要熟知球例，nowTV主持「阿旦」鄧伊玲與一班「少女同萌」靚女，就瞓身Cosplay變身Super Heroes「欖」住你講Rugby球例，嘩，正呀喂！

一眾靚女主持變身正義英雄，教大家欖球球例。

大嘉殷：專心聽書呀！

阿旦：達陣攞分最型！

首先出場的是「阿旦」：「贏波要攞分，最型嘅攞分方法叫達陣！只要進攻球隊將個波，帶到對方嘅達陣區，以手或身體壓向對方嘅入球區就可以得分，啲球員成個飛身剷入去，真係好Man呀。」

細嘉茵加把口：「傳波又要點呢？比賽時球員可以周圍走，但傳波就要向後傳，如果用手將個波傳向前方隊友，咁就係犯規。」

跟手到大嘉殷：「踢足球要踢90分鐘，但打Rugby咁辛苦，比賽就冇咁長嘅，Rugby上、下半場各7分鐘，中場休息則有2分鐘，所以大家要落足眼力睇到實喇！」

撲唔到飛去邊度睇？

Rugby 7公開發售的門票早已賣清光，不過想睇波都有辦法，事關在大球場外、中環海濱摩天輪及數碼港有欖球派對，球迷可透過大螢幕睇直播感受氣氛！

賽事聯合冠名贊助商滙豐，特別於大球場對面設立「七人欖球地帶」，內有多項互動遊戲，小球迷更可到兒童專區「畫大花面」，亦有機會接受Brian O'Driscoll等傳奇球星指導，整個活動免費向公眾開放，相對二手門票網站viagogo所求售的三天套票開價4,799港元，參加「七人欖球地帶」無疑更經濟實惠。另外，數碼港亦擺放大螢幕直播賽事，同場加設各種遊戲攤位。

七人欖球地帶多嘢玩

至於nowTV作為大會指定廣播機構，將於634台高清直播3天賽事，並在兩條免費頻道100及630直播賽事，公眾可利用「now Free TV」及「now隨身睇」應用程式收看比賽。官方亦在中環摩天輪舉行球迷派對，憑票入場的球迷可邊歎美食邊「拉闊Rugby 7」，票務詳情可瀏覽www.theclub.com.hk/rugby。