傷病狂潮肆虐NBA！繼高比拜仁、安東尼及戴歷羅斯等球星一個又一個倒下，聯盟昨日再傳來噩耗。拓荒者3分射手馬菲士左腳跟腱撕裂提早收咧，對於昨在主場以94:75擊敗小牛的拓荒者來說，可謂晴天霹靂！

馬菲士（左）收咧打亂拓荒者部署。（美聯社圖片）

NBA常規賽周日秩序

周五戰果

拓荒者昨仗輕鬆奏捷，憑艾迪列治及巴頓齊齊貢獻「雙雙」，主場以19分大勝小牛，不過會方卻「笑唔出」，事關陣中射手馬菲士於第3節初段跣腳倒地，需由軍醫扶入更衣室。初步了解過馬菲士的傷情後，拓荒者班主保羅艾倫被記者目擊到不斷搖頭，經磁力共振檢查後更證實馬菲士果然「大鑊嘢」，左腳跟腱撕裂需提早收咧，估計休養期約6至9個月。

沙格克服白血病復工

西岸強隊林立，拓荒者大前鋒艾迪列治早前延遲接受手指手術，目的就是帶隊「搏埋」季後賽，如今馬菲士提早玩完，無疑大大削弱拓荒者的攻守能力。今季場均貢獻15.9分、2.3次助攻及2.9個3分的馬菲士，3分命中球數於本季排第4，正值「合約年」的他如今重創，亦削減今夏傾新約的籌碼，難怪馬菲士亦灰爆稱：「凡事總有因，但我睇唔出今次（受傷）係有咩原因！」

同日，公牛憑摩亞絕殺得手，主場以108:105險勝雷霆，最令人高興是著名場邊記者沙格克服白血病，休養11個月後首度復工，足足瘦了50磅的他自爆全部衣服都不稱身，現時要添置過一批新衫。